اسمـع جـوابٍ كاليواقيـت وقمـاش

ملفـاه من يبخـص خوافـي معانيـه

ابن فـرج كسـاب الأمثـال ببـلاش

سهـلٍ عليه الجيـل يدعيـه ويجيـه

ما هو بمثلـي عنه الأمثـال تنحـاش

لو كـان يبغيـها فـلا هـي بتبغيـه

عسـاه يتحفنـي بـرد بـه إنعـاش

للقلـب كـود أنـه بـرده يـداويـه

لولا جـوابك يا محمـد فـلا جـاش

بالـرد لـي جـاشٍ وهـم مفاجيـه

تشكي زمانٍ متعبك يدهـش ادهـاش

وتقـول وين القـا صديقـن أشاكيـه

حسبك عقـولٍ ما علقـهن الأخـراش

إلاّ من أسبـاب الدهـر مع بلاويـه

ناهيـك منـها بالجديديـن ما طـاش

يومـن دهتـها بالليـالي دهـاويـه

العين طول الليل تسهـر من النـوح

يصخف لحالى كل من يسمـع بكـاي

والكبد من حر الهوى ذابهـا الفـوح

عيا يطفـي حـرهـا بـارد المـاي

من عقب ما همّي عن البال مزيـوح

غديـت يـالخـلان بلـشٍ ببلــواي

الله يلـد الحـب راعيـه مفضــوح

عجـلٍ يبيـح السـد ما هو بكمـاي

على غـزالٍ هايـف القـد مملـوح

خطـاف لعقـول العشاشيـق سبـاي

غـروٍ مشقينـي على غير مصلـوح

إن جيـت في ملـواه ما جا بملـواي